Super Mario Land [GB]

Super Mario Land dürft wou jedäm ä Begriff si. Bsunders dr Sound wosäch äuä i jedäs Hirni inäbrünnt het .

Abr für diä wos verpasst hei: im erschtä Mario Abentür ufm GB wird in beschtr Mariomanie wiä gwohnt dür verschidnigi Level grennt und gumpät, uf dr Suächi nach dr immr widr gsuächtä Prinzässin. Hinzuä chümä no Underwasser- und Lufwäutä wo eher anes Shooterlevel erinnärä(sis ja eigäntläch oh). Vor Thematik här chunntmä drbi undr andäräm bi dä Ägüpter, Piuzwäutä und Chinesä vrbi. Undrmalä wird das ganzä dür prägendi MarioMeloadiä wiämäsä us dä andärä Mariotitlä beschtens kennt. D Ändgägner machä komischerwis Grüsch, aus würdmä ä Geiss(eine Ziege) ufnä abnormali Art penetriärä, wemä ufsä schiässt.

Am Änd vo dä meischtä Levels chamä no paar Läbä gwinnä wemäs gschafft het dr CHLI schwerär Usgang ds erreichä. Ä anderi Bsunderheit isch, dass wemä ds Game dürägmacht het unds de grad nomau zockt, auäs chli schwerär wird(meh und anderi Gägner scho am Afang).

I cha Super Mario Land ohni Bedänkä jedäm as Härz legä. Vo mir bechunnts dank dr Nostalgie diä voui Punkzau.

Daedalian Opus [GB]

Daedalian Opus. Definitiv eis vo minä Liäblingsgames… wes um Fäuchöif geit! I gloub abgseh vo eim andärä Titu gits keinä wo no schlimmr gsi isch aus das woni jung bi gsi.

Ds Schpiuprinzip isch rächt simpu: fü~u(usfüüüuä) mit Tetrisähnlächä Teili ä Flechi us um i ds nächschtä Level ds cho. Tönt rächt simpu – ischäs abr nid. Was am Afang rächt liächt erschint wird mit dr Zit zum verzwiflä.
D Puzzle-Teili ligä näbä dr Flechi womä muäs usfüuä, wärdä mit eim Chnopf packt/abgleit, mitmnä andärä dräit und mit SELECT no gschpiäglät. I paar Levels hets sogar no ds viu Teili. isch ja nid so aus wärs o schüsch scho rächt schwär.
Zitlimit gits zum Glück nid. Nach jedäm beschtandnigä Levels gits äs Passwort. Zwüschä dä einzelnä Level darfmä immrhin no säuber hin und här loufä wasäs abr o nid grad viiiu bessr macht.
D Grafik isch rächt simpu ghautä, abr si erfüut dr Zwäck.
Musig isch o vrhandä, abr äs wär wünschenswärter gsi dasäs chli verschidnigeri Träcks git, da diä vorhandänä doch rächt schnäu uf’d Närvä chöi gah undsäch ids Ghirni ibrönnä.

O nach über 10 Jahr isch das Game no nid viu besser wordä… o weni mittlerwilä chli witr cho bi… zumnä super Game längts glich nid. Äs ma si, dasäs gwüssä Lüt gfaut, abr dä meischtä chani mit guätäm Gwüssä drvo abratä.

Brain Bender [GB]

Brain Bender, Brain Bender, Brain Bender… was fangi numä mit dir ah.
Kouft hanis zurä Zit womä au paar Mönät mau 1 Game het vermögä(bessergseit vo dä Eutärä odr schüschtigä Verwandtä gnuäg Gäut drfür het becho aka diä eher jungä Jahr) und nid äs paar Games im Monät. Sehr hüfig hanis wiä o anderi Games woni ufgrund vom Cover aus chlinä Giu(e Biebli) kouft ha nid würkläch gschpiut(äs isch o scheiss’schwär gsi).
Vor paar Täg hets dr Wäg i Modulschacht abr trotzdämm mau widr gfundä und so chani grad so guät no schnäu drübert schribä.

Brain Bender isch äs Gschicklächkeits/Puzzle Game. Ds Prinzip isch eigäntläch rächt simpu: ä Laserschtrau ids Ziu „länkä“. Das machtmä mit Hiuf vo dräibarä Schpiäglä wo dr Schtrau (logischerwis) witerleitä. Zuäsätzläch gits no Pünkt womä mitm Laser muäs berüärä damitsi vrschwindä odr „Schauter“ womä mitm Laser muäs aschautä. Tönt nid sehr kompliziärt und äs wär o nid grad huuuärä schwär wes nid no äs rächt knackigs Zitlimit hätt. Füärtmä dr Laserschtrau us versehä dörthärä zrügg wonr entschpring, so ziäts EXTREM viu vo dr verblibendä Zit ab. Au paar Levels gits Glücklechrwis äs Passwort wo eim doch chli hiuft witer ds cho. Früänr hanis nid mau zum erschtä Passwort gschafft, abr sitt mini Inteligänz um äs viufachs höchr ligt aus bi dä gschidschtä Mönschä uf Ärdä, hanis bim erschtä Versuäch de doch bis zum ca. 5ä PW gschafft. Was SEHR agnähm isch: sobaudmä ä Versuäch vergitt ischmä nid grad Game Over sondern cha vo sinä Punkt womä erreicht het witeri Versüäch erhautä.
Grafisch isch’s rächt simpu ghautä und leidr chli repetiv. Grossi Grafikfürwärch wirdmä nid aträffä, abr äs erfüut si Zwäck. Verschidnigi Hindergründ hättä o nid gschadät.
D Musig isch leidr chli seeehr dürftig usgfauä und biätä nid würkläch abwächslig – benidenswärt mögä diä si wosä chöi ignoriärä.

Trotz grössäräm Nostalgiebounus schaffts BB bi mir nid i diä obärä Räng. Für das gits ds guäti GB Games. ABER für Freunde des Schoooores isch’s ä Versuäch wärt – viläch isch’s ja gnau das wo öppr gsuächt het. Am beschtä mau äs Video uf Youtube luägä und säuber urteilä. Ds Cover isch drfür rächt guät glungä und erinnärät chli a d Box vom erschtä GB.

Felix the Cat [GB]

4h ohni Schtrom und mä muäs däheimä sitzä bis’d Schtromer aui Schtromleitigä ernöiärät hei. Was machä? Felix the Cat afangä. Grafisch und schpilerisch isch’s nid würkläch ds Gäubä vom Ei, aber für chli Schpass längts und äs git sichr schlechtrs. D Verwandligä vom Felix sobaudr paar Items gsammlät het bringä immrhin chli Abwächsli. Sogar äs Shooterlevel hets… und nach paar Levels hetmäs o mit eim Credit dürä.

+ nid ds läng und nid ds churz
+ vrschidnigi Verwandligä(Outo, Panzer, Heissluftballon etc.)
– Ds liächtä Schwirigkeitsgrad