Astyanax [Famicom / NES]

Und scho widr ä Titu meh womä i’d Kategorie “A eim Namitsch düräzockä” cha schteckä. Astyanax (in Japan “The Lord of King”) isch ä tüpischä Sidescroller wo ir Fantasywäut agsidlät isch.
D Story handlät vor Prinzässin Rosebud wo vom bösä Zouberär Blackhorn gfangäghautä wird. Dr Heud wird us üsärä Wäut vorä Fee i’d Fantasywäut gholt, cha abr numä vor Prinzässin zrügg’gschickt wärdä. Somit blibt eim nix anders übrig aus einisch meh ä Prinzässin ds rettä(ussrt mä wotts nid u schautät ab) um widr i sini Wäut zrügg ds chehrä. Diä ganzi Story wird dür regumässigi Anime/Mangasequänzä witererzeut und machä ds ganzä chli Schtimmigsvouer ausäs eigäntläch wär… definitiv ä grossä Pluspunkt.
Damitmä nid gaaanz soviu Müä het gits ab und zuä paar PowerUps wiä Waffä- und Zouber-upgrades sowie gwohnti Energie’erfrüscher.
Ds Game beschteit us 6 Wäutä wo jewils i bis zu max. 2 Levels underteilt isch. Aus Gägner schteuäsäch eim Skelettartigs, Schliimartigs, Fischartigs, etc. i Wäg… I nid au zu wit usänandligendä Abschtänd chömä no paar schöni Bossä drzuä(teilwis fasch Biudschirmhöch!).
Ds 2tletschtä Level schticht dür ds Wägfindä no chli usä: mä muäs uf’d “Zeichä” achtä damitmä weis weli Türänä dasmä söu wählä für witer ds cho(ischmr am Afang gaaaar nid liächt gfauä-_-).
Grafisch isch ds Ganzä rächt bunt, aber o passend gratä. Schöni Farbpalettä, teilwis sehr schöni Bossä, ä agnähmi Gägnerpalettä und ab und zuä paar Details. Für NESverhäutniss o sehr schöni Biuder währänd d Story witererzaut wird.
Dr Sound schticht leidr nid sooo sehr herus, aber är geit zumindescht nid uf’d Närvä.

I würd Asryanax sicherläch nid aus TopTitu bezeichnä, abr wemäsäch mau chli drmit usänand gsetzt het und grad nix gschiders vor het(amnä Sunntig Namittag nach dr Fasnacht), chamä doch si Schpass drmit ha und mä hets nach paar Schtund o mau bis ad’s Ändi gschafft, da eigäntläch aui Passagänä fair und o d Bossä machbar si.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.