Abadox: The Deadly Inner War [Famicom / NES]

Abadox: The Deadly Inner War. Was fürnä positivi Überraschig! Nachdämis bim erschtämau aschpilä nid grad sonderläch witt gschafft ha, hanis nach paar Täg nomau probiärt und äs hetmi sowas vo inäzogä dasi drannghockt bi, bisis fertig’gschafft ha. Und das isch würkläch nid grad wenig lang gangä…

Vom Syschtem här isch Abadox wiä diä meischtä Shooter – mä flügt inä Richtig und zerschiässt auäs wosäch eim i Wäg schteut. Wasäs no chli schpezieur macht isch dasmä mängisch o vo Obä gägä Abä flügt. Am Afang doch no rächt Gwöhnigsbedürftig! Am Änd vo jedäm Level wartät wiä gewohnt no ä hässlächä Boss. PowerUps dörfä natürläch nid fählä und äs het paar schöni Waffä drbi. Ds Setting vom Game schpiut +- imnä risigä organischä Wäsä. Mä flügt inä Gigantischi Schnurä inä und macht eigäntläch dr ganz Wäg dürä bismä usm “Arsch” widr usächunnt. D Grafik isch drbi rächt nätt – mä erkennt schöni Innereiä und o d Gägner si abwächsligsrich gschautät. Ganz zu schwigä vo dä Bossä.

Vom Schwirigkeitsgrad isch’s würkläch heftig schwär wemäs nid Usswändig kennt. Gwüssi Passagä schafftmä numä mit viuviuviu Glück odr mä weis haut würkläch wasmä muäs machä(z.B. mau gwüssi Gägner NID abschiässä!). Und mä muäs jedi Schteu schaffä, denn es git keis witerflügä nachdämms eim troffä het sondern mä schtartät bim letschtä Checkpoint. Was eim aber entgägächunnt si diä unäntläch Credits womä het… und o brucht. Zumindescht bim erschtä Versuäch.

Für mi Gschmack definitiv ä empfählenswärtä Shooter wemänä biuig bechunnt. Fürnä Namittag gits würkläch schlechteri Underhautig.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.