Gunbird 2 [DC]

Nach ca. 10 Jahr het bi mir Gunbird 2 nomau ä Chancä becho… und i muäs sägä: WOW.
Ha das Schpiu dennzumau komplett underschetzt… abr nachdämis äs Weekend usgibläch zockt ha muäsi igeschtah dasmr fasch ä sehr geilä Shooter ha la entgah.

Mä wäut einä vo 7 Charakere(Morrigan agäbläch DC exklusiv) wosäch in Fürchraft und Gschwindigkeit wiä gewohnt underscheidä. Denn geits eigäntläch wiä in gewohnter Vertikal-Shooter Manie los. 1 Chnopf zum Schiässä, einä für’d Bombä und mängisch no ä Chnopf für Specials. Ds ganzä Game isch im Manga’schtiu ghautä und o nid grad ds trischtischtä woni je gseh ha – zwüschä dä Levels wärdä no paar Dialög mit Biudr ibländät. Diä erschtä 3 Levels chömä nachäm Zuäfausprinzip(us 4nä womä nid säuber wäut) und ds Game beinhautät 7 Levels.  D Gägäwehr beschteit us dä verschnidnigschtä Mechas, Flüger und Bossä mit guät sehbarä Schussmuschter(i hassäs wemä d Schüss vo dä Gägner nid guät wom Hindrgrund odr dä eigänä Schüss cha usändnaderhautä). D Bossä si fordernd, schön animiärt und hei mehräri Schtuäfänä. Mä chanä einzelni Elemänt wägschiässä und jedä vonä besitzt no ä witeri Transformation.
Wasmr o sehr gfauä het isch ds Scoresyschtem. Näbä dä üblächä Gägner und Bossabschüss gits no Münzänä wo gwüssi Gägner hindrlöh. Wärdä d Münzä im richtigä Momänt ufgsammlät(mit dr blinkendä Sitä zum Schpiler) gits wäsäntläch meh Pünkt und mä cha ä Punktecombo usäholä. Zuäsätzläch gits i dä meischtä Levels(hasä no nid i jedäm gfundä) no sowas wiä ä glügendä Chruäg wo Diamantä usschpuckt wemä ufnä schiässt. Diä Chrüäg erschinä numä wemä zum richtigä Momänt am richtigä Ort drübert flügt!

Gunbird 2 trifft gnau mi Gschmack und diä Schwirigkeit woni gärn ha. Somit wirds in Zuäkunft widr regumässig i mim DC adsträffä si. Shooterfrens chöi ohni Bedänkä zuägriffä.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.